ثم 'إضافة إلى الشاشة الرئيسية'
ثم 'إضافة إلى الشاشة الرئيسية'
مقدمة
كلنا عارفين ومش جديدة علينا اننا نقدر نعمل ايميل احترافي باسم الموقع بتاعك يعني مثلا انا موقعي اسمه www.Abramo.xyz فانا اقدر اعمل ايميلات بإسم الموقع بتاعي زي Youssuf@Abramo.xyz واقدر اعمل اي ايميل تاني تحت اسم @Abramo.xyz لاني بمتلك النطاق دا. وكل دا مش جديد ولا حاجة بس الجديد هنا انك تقدر تربط الايميل دا بايميلك الجيميل، يعني لو انت عندك ايميل مثلا على الجيميل باسم Yosef.Abramo@gmail.com ودا ايميل غير حقيقي بالمناسبة عشان محدش يبعتلي عليه فانت تقدر تستقبل الايميلات اللي بتجيلك على Youssuf@Abramo.xyz تستقبلها على Yosef.Abramo@gmail.com والموضوع سهل جدا وبسيط في تنفيذه، لا ومش بس كدا انت تقدر كمان تبعت رسايل من الجيميل بتاعك باسم الايميل البيزنيس! فحاجة صراحة جامدة يعني.
المتطلبات
الموضوع دا مش هيكون متاح في بعض الحالات فيه شروط بسيطة كدا الناس كلها تقدر عليها لازم تكون موجودة فانا حابب اذكرها من باب العلم بالشيء عشان لو حصلك مشكلة تقدر تراجع النقط دي.
المتطلب الاول: لايف سيرفر
لو انت شغال على لوكال سيرفر او Virtual Machine على جهازك يبقى لللأسف الموضوع دا كله مش هيشتغل، لان الموقع بتاعك واسم النطاق بتاعك وكل حاجة خاصة بيك موجودة على جهازك انت بس يعني كأنك عندك افكار لتغيير العالم بس العالم مبيتغيرش لانها مش موجودة اصلا غير في دماغك.. نفس الفكرة ولا هتستقبل ايميل ولا هتبعت ايميل ولا هيتم الربط ولا اي حاجة لان كل العالم دا مش موجود غير على جهازك.
المتطلب الثاني: سيرفر بانل
لو انت الاستضافة بتاعتك مش بتدعم اي Server Panel زي hpanel بتاعت هوستنجر او cPanel اللي موجودة في اغلب الاستضافات او حتى plesk او AAPanel او غيرها من واجهات التحكم في السيرفر، طبعا دا مش مطلوب بشكل اساسي لان حتى لو مفيش فانت تقدر تعمل الموضوع Command Lines بس الموضوع محتاج مبرمج طبعا فلو انت مش مبرمج مش هتعرف تعمل الموضوع دا الا بوجود مطور او Server Panel.
المتطلب الثالث: عنوان بريد إلكتروني
طبعا كدا هيبقى ناقصك انك يكون عندك بريد الكتروني احترافي بإسمك وبريد إلكتروني آخر معمول على الجيميل. ودا بديهي جدا يعني.
طريقة استقبال البريد عن طريق الربط بين الايميل الاحترافي وايميل الجيميل
انشاء بريد الكتروني احترافي
انا هفترض انك بتستخدم cPanelعلى السيرفر بتاعك وهشرح بناءا على هذا الاساس ولكن الطريقة دي هتنفع مع باقي الـServer Panels التانية مع اختلافات بسيطة في الواجهه والخطوات ولكن الفكرة والاساس كله واحد مبيتغيرش.
هتروح على الـcPanel بتاعتك وهتبحث فيها على Email وهتدوس عليها
بعد كدا هيظهرلك جوة الـEmail List بتاعتك وفي الغالب لو انت اول مرة تفتحها مش هيكون فيها اي حاجة فبكل بساطة هتعمل Create لو انت مش عامل واحد او هتعمل Modify او Edit او Manage لو انت بالفعل عندك ايميل وعايز تربطه. الطريقة في الاخر واحدة.
لو انت عندك بالفعل ايميل احترافي فتخطى الخطوة دي وكمل معايا من الخطوة الجاية، بكل بساطة اول ما تفتح معاك انك تعمل ايميل جديد اعمل واحد بالاسم اللي انت عايزه واكتب الباسوورد وخليك فاكره كويس وفي النهاية دوس على كلمة Create.
الربط بين الجيميل والبريد الاحترافي
هترجع مرة تانية لصفحة الـEmail List وهتلاقي الايميل بتاعك اتعمل، دلوقتي بقى هتدوس على Connect او حسب ما هيظهرلك..
وبعد كدا هيتفتح معاك الصفحة دي، هنا بقى ركز اوي اوي.. هتاخد البيانات اللي مكتوبة هنا هنروح نحطها في حسابك الجيميل وهقولك هتحطها فين بالظبط امشي معايا خطوة خطوة
هتفتح الجيميل بتاعك وهتدوس على ايقونة الترس اللي فوق على اليمين لو انت نسخة انجليزي او فوق على الشمال لو انت نسخة عربي وبعد كدا دوس على See All Settings
بعد كدا هتدوس على Accounts & Import وبعدين هتنزل تحت وهتروح على قسم الـCheck mail from other accounts وهتدوس على زرار Add a mail account
بعد كدا هيظهرلك نافذة جديدة هتكتب فيها بريدك الالكتروني اللي انت انشأته في الـcPanel وبعدين هتدوس Next
- بعد كدا هيظهرلك البيانات اللي قدامك دي، بكل بساطة هتكتب البيانات اللي ظهرتلنا في الـConnect Device اللي قولتلك عليها احفظها، البيانات اللي هتكتبها بالترتيب كالتالي: بريدك الالكتروني
- الباسوورد بتاع البريد
- الـPOP Server ودا لو انت مش عارفه ممكن تكلم دعم الاستضافة تقولهم انك بتعمل Integration مع الجيميل ومحتاج الـPOP Server هما فاهمين وعارفين الموضوع دا وهيبعتوهولك عادي.
- الـPort هتختار 995 لان هو دا Port الـPOP
- لو عايز تستقبل الايميلات على الجيميل مع الاحتفاظ بنسخة على السيرفر هتعلم على خيار Leave a copy of retrieved message on the server.
- هتعلم على خيار Always use a secure connection (SSL) when retrieving mail عشان تتأكد ان كل الايميلات اللي هتجيلك تكون بإتصال SSL
- الخيار دا بقى حلو اوي علم عليه عشان اي ايميل يوصلك يقوم عاملك عليه زي Label صغير كدا يقولك انه واصلك من ايميلك الـBusiness، اسم الخيار هو Label incoming messages وهتختار الكلمة اللي هتظهرلك
بس كدا انت ضيفت البريد بتاعك، الف مبروك عليك يا صديقي، تقدر تستقبل ايميلات وتعمل تيست براحتك وادعيلي..
طريقة عمل تزامن بين الجيميل والبريد الاحترافي
فيه مشكلة صغيرة كدا في الطريقة اللي شرحناها فوق ودي مشكلة طبيعية جدا بتحصل بشكل طبيعي مش بسبب اى خطوة غلط او اى خطأ منك، المشكلة هي ان احيانا اما حد بيبعتلك ايميل مش بيوصلك في ساعتها ودا بسبب ان الجيميل مش متزامن مع البريد الالكتروني الاحترافي بتاعك، طيب السؤال هنا ازاي اخليه متزامن؟ للأسف مينفعش، الحل الوحيد هو انك تشتري استضافة ايميلات من جوجل نفسها ودي بتبقى باقة وباشتراك سنوي وبتستخدم الايميل البيزنيس بتاعك عادي بعد ما تربطه -الربط هنا بيكون بشكل مختلف- انما في حالتنا احنا الوضع دا غير قائم، فالحل هنا انك بتعمل تزامن بشكل يدوي، الجيميل بشكل افتراضي بيعمل Check على السيرفر عندك بالـConnection اللي احنا عملناه عشان يشوف هل فيه ايميلات وصلتك ولا لا ودا بيحصل كل فترة من الزمن والفترة دي غير محددة يعني ممكن كل ساعة ممكن كل 3 ساعات كدا يعني مفيش رقم ثابت.
تعالى بقى اقولك ازاي تعمل تزامن بشكل يدوي عشان تعمل Check على الايميل بتاعك، الموضوع بسيط جدا انت هتروح على نفس الاعدادات اللي كنا فيها قبل كدا بعد ما تلاقي البريد الالكتروني الاحترافي بتاعك اتعمل هتلاقي فيه تحتها زرار Check mailbox هتدوس عليها. بس كدا لو حد بعتلك ايميل هترجع للـInbox هتلاقيه وصل.. لو محدش بعتلك حاجة يبقى مش هيوصلك حاجة، وتقدر تشوف آخر مرة اتعمل Sync كان امتى من التوقيت اللي بيبقى مكتوب تحت البريد الالكتروني بتاعك
طريقة ارسال الرسائل بإسم بريدك الاحترافي
بعد ما عرفنا ازاي تستقبل الرسايل على البريد الالكتروني الاحترافي وتستقبله على الايميل الشخصي على جيميل تعالى بقى اقولك ازاي تستخدم الايميل دا في انك تبعت رسائل لايميلات تانية او ترد على الرسائل اللي بتوصلك باسم البريد الاحترافي بتاعك
اعطاء الصلاحيات من البريد الاحترافي
هتروح تاني على اعدادات الجيميل وتفتح برضو Accounts & Import وبعدين هتروح على سيكشن اسمه Send mail as هو دا المسؤول عن الربط وزي ما انت شايف مكتوب تحتها (Use Gmail to send from your other email addresses) يعني الكلام واضح زي الشمس. بكل بساطة هتدوس على Add another email address
بعدين هتتفتحلك النافذة دي هتدوس على Next
بعدين هيظهرلك البيانات دي هتكتبها كالتالي:
- سيرفر الـSMTP تقدر تاخده من دعم الاستضافة بتاعتك لو انت مش عارفه
- هتختار الـPort رقم 465 لان دا اللي شغال على الـSSL
- الـUsername هو الايميل بتاعك
- هتكتب الباسوورد بتاع الايميل البيزنيس
- وهتتأكد انك مختار اوبشن الـSSL
بس كدا هتدوس على Add وهتلاقيه ظهر عندك تقدر بعد كدا تروح علىCompose على سبيل المثال عشان تبعت بريد وتدوس على to وتختار الايميل اللي انت عايز تبعت منه ونفس الطريقة اما تيجي تعمل Reply هتدوس على to وتحتار الايميل اللي هترد بيه. وتقدر ترجع للخطوات اللي فاتت هتلاقي الايميلات بتاعتك كلها موجودة ممكن تدوس على Make Default عشان تخلي ايميل معين هو اللي يبقى مختار بشكل افتراضي تبعت منه ايميلات على طول بدل ما كل شوية تدوس على to عشان تغير
انشاء بصمة او امضاء
شايف انت اخر صورة موجودة فوق الجملة دي؟ لو تلاحظ فيه زي امضاء وبيانات كدا مكتوبة ورقم هاتف وحاجات زي كدا دي اسمها امضاء، كل اما بتيجي تكتب ايميل جديد او تعمل Reply بيتم كتابة الامضاء بشكل تلقائي، خاصية لطيفة اوي في الجيميل ممكن تعملها. هتروح على اعدادات الجيميل تاني وهتروح على General وتنزل تحت شوية لحد القسم Signature وتضيف الامضاء اللي انت عايزها وممكن تحط صورة ليك او صورة امضتك الالكترونية مثلا.
ملحوظة
تقدر تربط ايميلات احترافية كتير على نفس حساب الجيميل بتاعك، فدي ميزة جامدة اوي لانك مش مضطر بعد كدا انك تفضل تفتح كل ايميل على حدى عشان تتابع وتراجع كل ايميل. ملحوظة تانية الطريقة دي مجانية 100% وبتعتمد في الاساسي على الربط بين الايميلات يعني انت مش بتستخدم الجيميل نفسه كـEmail Hosting Provider لأ خالص انت بتستخدم الـEmail Hosting الأساسي بتاعك اللي انت شاريه او اللي جاي اصلا مجانا مع الـWeb Hosting بتاعك وبعد كدا بتربط الايميل الاساسي بالايميل الثانوي اللي هو اليجيميل. اما عشان تستخدم الجيميل كأساسي بالنسبالك فلازم تشتري منهم Email Hosting مدفوع.
