ثم 'إضافة إلى الشاشة الرئيسية'
ثم 'إضافة إلى الشاشة الرئيسية'
انا عارف يا صديقي ان من ساعت ما انت وعيت على الدنيا ووعيت على الـMarketing وانت تعرف ان الـWhatsApp Business هيخليك تتواصل مع العملاء بتوعك بشكل مباشر.. وبلا ادنى شك دي افضل طريقة تتواصل بيها مع العملاء اونلاين.. دا غير انك جمعت معلومات مهمة جدا جدا عن العميل من خلال رقم موبايله فقط تقدر تتواصل معاه على 3 حاجات مختلفة!!
- رقم الواتساب
- رقمه للاتصال
- المسنجر من خلال سيرش او retargeting ad
لحد هنا والكلام جميل وزي الفل..
للأسف هو ولا جميل ولا زي الفل.. لان الموضوع دا نسبي جدا وبيختلف حسب المجال اللي انت شغال فيه.. لو عقارات يبقى يانهار ازرق دا كنز حرفيا.. انما لو بتبيع منتج بسيط زي حامل لابتوب مثلا.. تفتكر هل الموضوع هيكون كنز برضو؟ تخيل لو انت بتبيع كورس اونلاين او بتبيع مثلا شرابات او منتجات قيمتها قليلة.. وجود WhatsApp Business ليك هيخليك برضو تتواصل مع العميل وكل الكلام الجميل اللي فوق دا.. بس دا هيسببلك مشاكل كتير على الجهه الاخرى وقد تتساوى مشاكله مع مميزاته وفي بعض الاحيان عيوبه هتتخطى ايجابياته..
خليني اقولك ليه… وجود وسيلة تواصل بينك وبين العميل اثناء بيع منتج معقد هي حاجة في غاية الاهمية.. لان دا هيسهل على العميل انه يفهم اكتر المنتج او الخدمة بشكل افضل، ودا هيديك فرصة كبياع انك تفهم عميلك وتتكلم معاه وتعمل حوار بينك وبينه تكسب فيه ثقته وانت وشطارتك..
بس تعالى طبق نفس المنطق دا على كباية مطبوع عليها شخصية انمي مثلا تفتكر ايه الحوار او النقاش اللي ممكن يدور بينكم؟ حرفيا ولا حاجة.. يبقى ليه المناهدة؟ هتحرق مجهود وهتهلك طاقتك على الفاضي! دا غير انك كدا بتخلق فرصة للتفاوض والفصال مع العميل على المنتج وكأنك بتقفل بيعة معاه بمليون جنيه.. دا غير ان البياع او المودريتور اللي هيمسكلك الواتساب او الصفحة ممكن ميكنش مدرب بالشكل الكافي على فن الرد ومهارات البيع وبالتالي ممكن يكون فيه خطأ بشري كبير جدا في عملية البيع!
متستخدمش الـWhatsApp Business.. عشان اى Business محتاج يكبر لازم يعتمد على الـAutomation.. وعشان تعرف ايه هو الـAutomation.. خليني اقولك ايه هو الـAutomation وازاي تقدر تحققه.. بس خليني قبل ما اقولك ايه هو دا عايزين نفهم الاول يعني ايه دخل سلبي.. الدخل السلبي هو الـincome اللي هيخش جيبك منغير ما تتعب عشانه.. منغير ما تشتغل فيه.. منغير ما تشتغل ولا شغل بدني ولا عقلي ولا اي حاجة .. انت بتكون نايم والمشروع او الشغل بيدخلك فلوس.. ازاي بتعمل بقى القصة دي؟؟ من خلال الـAutomation اللي اتكلمنا عنه..
بكل بساطة انت هتخلي عملية البيع الاساسية من الاول خالص لحد ما تخلص مبنية على سلوك العميل وتصرفه فقط بدون اى تدخل يدوي منك.. سواء باقناع او بتواصل او بتسجيل بيانات او بتسجيل الطلب او اى حاجة من دي.. تخيل لو نفذت دا عندك في البيزنيس انت كدا بتدخل دخل سلبي! قدرتك على النمو في الحالة دي احسن وافضل كتير جدا من غيرك..
حد عبقري هيطلع يقولي انت قولت مش هشتغل وهيخشلي فلوس.. هقولك انت مش هتشتغل عشان تحصل الفلوس.. انما لازم هتشتغل بعد ما تحصل لانك هتجهز وهتشحن الطلب..
هتعمل سيستم قوي يتبنى عليه عملية البيع وانت هتكون ادرى بمراحل البيع لان البيزنيس بتاعك وانت عارف بتبيع ازاى، والسيستم دا هيكون مزيج بين البيع الحقيقي والبيع اونلاين عشان يوفر للعميل تجربة شراء احترافية.. احسن طريقة لعمل الـAutomation من وجهه نظري هي ان يبقى عندك موقع الكتروني بتقدم عليه خدمتك او متجر الكتروني بتبيع فيه منتجاتك وتربط الموقع بفودافون كاش عشان تستقبل فلوسك باسهل طريقة..
بس كدا…
انا يـُـوسـِف أبـرامـُو وبعشق إفادة الناس 
وهكون مبسوط لو عايز تستفسر عن اى حاجة وكتبتلي 
