محتوى المقال

إستمع بدلا من القراءة

نسخة الووردبريس 6.4.2 الجديدة

تحديث جديد في الووردبريس نزل امبارح بتاريخ 6 ديسمبر، وعشان احنا بتوع الجديد فدايما بكلمكم على كل جديد فتعالى بقى اقولك على التحديثات المبهره اللي الووردبريس فاكر انها مبهره وهي ولا مبهره ولا حاجة بس انا صراحة هحاول اجيبلهم اي ميزة عشان بس مكنش بهاجمهم -شغلنا هيتضر يا عم مش هنهاجمهم لا-  المهم بدون ما اطول عليكم انا هتكلم عن ابرز الحاجات اللي شايفها ممكن افتح فيها كلام ونتناقش فيها.

حابب اقولك ان قبل ما تنزل التحديث دا لازم تقرا المقال دا كله ولازم طبعا تاخد Backup من الموقع بتاعك عشان لقدر الله لو عملية التحديث دي فشلت تحت اي ظرف الموقع بتاعك ميخربش او ملفات يحصلها Damage او اي اخطاء او اعطال غير متوقعه تحصل عندك، وانا برشحلك اضافة جميلة جدا بتعمل Backup بكل سهولة اسمها All In One Migration ودي انا شخصيا بستخدمها وبعتمد عليها في كل شغلي وهي اضافة مجانية تقدر تستخدمها بس انصحك تشتريها لان النسخة المدفوعة فيها مميزات اكتر واحسن مليون مرة وسعرها 89 دولار تقريبا بس انا مش ناسيك وانت حبيبي فلو عايز تشتري النسخة الاصلية منها بسعر مخفض ممكن تشتري نسخة All In One Migration Ultimate Extension بسعر وجبة فراخ  من عندي على الويب سايت. دوس هنا عشان تعرف تفاصيل اكتر

قالب Twenty Four الافتراضي الجديد

بصراحة انا هكون منصف وهقول ان القالب دا عجبني جدا، مش عشان قدم حاجة جديدة لا خالص، بس انا بحب اشتغل باي حاجة Default افتراضية في الووردبريس ومبحبش افضل انزل حاجات خارجية عشان اعمل حاجة معينة انا محتاجها. القالب دا شميت فيه ريحة النضافة، بداية من التصميم البسيط جدا بتاعه واللي في نفس الوقت منظم جدا ودا مكنش موجود في القوالب الافتراضية القديمة والجدير بالذكر ان القالب دا سرعته على جوجل عالية جدا قد تصل الى 99 من غير ما تلسمه ولا تشتغل على اي حاجة في السرعة.

نصيتحي بخصوص القالب دا، استخدمه في حاله انك هتعمل مشروع from scratch بتصميم مخصص، يعني مش هينفع معاك اوي لو هتعمل موقع بجد هو اه لطيف وخفيف وبسيط بس برضو مش هيلبي كل احتياجاتك وحقيقي انا متحمس جدا اني اجربه في مشروع حقيقي واشوف الأمور هتمشي معايا ازاي في القالب دا.

امكانية عمل Lightbox Popup على الصور

كتير هيستغرب ازاي دي خاصية جديدة في نسخة الووردبريس 6.4.2 الجديدة دي حاجة عادية جدا وموجودة في اي قالب واي Page Builder بس الحقيقة ان الووردبريس لسا واصلاله المعلومة متأخر ومكنش فيه الخاصية دي في القوالب بتاعته الافتراضية واخيرا اهو ضافها.. تقريبا كدا الووردبريس عايزله بتاع 100 سنة كمان عشان يبدأ بس ينافس القوالب الحالية.

بكل بساطة بعد ما بتضيف الصورة بتاعتك بتدوس عليها وتفعل خيار Expand on Click عشان تشغل خاصية الـ Lightbox Popup اللي هي اصلا من كتر ما هي بديهيات نسينا انها خاصية لان طبيعي تبقى موجودة. طالما جبنا سيرة الصور يبقى بالمرة بقى انا حابب اقولك انك لازم تعمل تحسين للصور بتاعتك من خلال اي اضافة تحسين صور على الووردبريس وانا اقترح اضافة Imagify او اضافة EWWW Image Optimizer وسبق واتكلمنا عنهم قبل كدا.

تعطيل صفحات الـAttachments بشكل افتراضي

الووبدريس عطل صفحة الـAttachments بشكل افتراضي يعني مش هتضطر انك تعطلها بعد كدا بنفسك، بصراحة انا اول مرة اعرف اصلا انه كان بيعمل صفحات للـAttachments ومعرفتش الا اما التحديث نزل فدخلت اقرا اصلا عن الموضوع دا اكتر لقيت ان كان في الاول متفعل بشكل افتراضي وهما وقفوه.. اه وربنا زي ما بقولك كدا تخيل كانوا عاملين صفحة مش متشافة عندك في الووردبريس للـAttachments قمة العبث والله.

الفكرة بقى في ايه ان انت لو عندك الموقع بتاعك وعملت تحديث دا مش هيعطل الخاصية دي! يعني لازم تعمل موقع جديد عشان الخاصية دي تكون متعطلة بشكل افتراضي فحتى لو عملت تحديث دا مش هيحل المشكلة، فهتضطر انك تعطله بنفسك وانا برضو بحبك ومش هسيبك فجبتلك الكود اللي هتعمل بيه القصة دي

Copy

            update_option( 'wp_attachment_pages_enabled', 0 );
        

هتضيف الكود باستخدام اي اضافة Code Snippet وتحطه طبعا في كود الـ PHP

امكانية اضافة صورة على Group Block في محرر الصفحات الافتراضي

والله العظيم انا مكسوف اقول ان الشيء دا تم اضافته في التحديث الجديد، انا منبهر من اللي الووردبريس بيعمله. ليه التهور دا يا جماعة بلاش كدا صحتكوا. قبل كدا مكنش ينفع تعمل حاجة زي كدا.. بس دلوقتي حصريا ولأول مرة الووردبريس بيتهور وبيضيف الخاصية المهلبية دي كخاصية مدمجة بشكل افتراضي.. اتفضل يا عم شوف العظمة

اضافة Hooks على الـBlocks في المحرر الافتراضي

صراحة دي اكتر حاجة فعلا عليها القيمة نقدر نقول ان تم اضافتها في الووردبريس. دلوقتي بقى فيه Hooks تقدر تستخدمها في الووردبريس ودي هتسمحلك انك تعمل حاجات كتير لطيفة في المحرر وطبعا مش محتاج اقول انك لازم تكون مبرمج بتعرف تستخدم الـ PHP بشكل كويس عشان تقدر تستفيد من الخاصية دي. وانا على نفس رأيي اللي قولته قبل كدا كذا مرة.. المحرر الافتراضي ضعيف جدا وما زال ضعيف ولكن من اللي انا شايفه حاليا انه بيتطور كل شوية تحديث بعد تحديث وانا براهن عليه انه هيكون من اقوى المحررات اللي هتنافس كبار الاضافات التانية بس الموضوع هياخد شوية وقت اعتقد على نسخة الووردبريس 8.0.0 ممكن يكون الوضع زي ما انا وصفته.

طيب برضو الـ Hooksدي فايدتها ايه؟ عارف انت الـHooks بتاعت الـWooCommerce ؟ لو قولتلي لأ مش هكمل كلامي والله. اهو الـHooks دي بقى بتسمح للمبرمجين انهم يضيفوا وظائف وخصائص اضافية على الـWooCommerce نفس الفكرة في الـElementor فيه اضافات بيتم اضافتها على المحرر عشان يطوروا منه وهاكذا.. انا بقى دلوقتي بقيت متأكد من وجهه نظري لان معنى انهم ضافوا الـHooks دا معناه ان المحرر الافتراضي في طريقه للتطوير اكتر واكتر لانه هيفتح مجال للمبرمجين انهم يضيفوا خصائص اكتر على اللي موجود دلوقتي.

دا مثال بسيط على خصائص تمت اضافتها بواسطة مبرمجين من خلال الـHooks دي وطبعا الموضوع مش هيقف هنا لسا هيكملوا اكتر على الموضوع والـHooks نفسها هتطور اكتر

بس كدا انا وصلت لنهاية المقال اتمنى يكون مفيش اي افادة وصلتك لان المقال اصلا غير مفيد